政情：九東選情危危乎阿陶勢畀黨爭累

兔年拉開新一頁，過年前爆出內亂嘅社民連、白鴿黨過年後都會整軍。尋日係初三赤口，政圈中人唔拜年，改為同傳媒閒話江湖事，講到近期連場黨爭對出年立法會選舉嘅影響時，社民連主席陶君行成為焦點，事關九龍東有望加一席，原本有機會穩落上屆攞到二萬八千幾票嘅阿陶身上，但社民連內亂搞到各方皆輸，阿陶更難逃被狙擊嘅下場，新一屆選舉好可能又係得個吉。

社民連喺虎年將盡時大分裂，依家亂事係咪告終仲係未知之數，不過，政圈對大分裂後嘅政局分析嘅共識就好大，因為政改方案通過之後，九龍東極大機會可以加一席，上屆選舉時，泛民由白鴿黨同公文袋兩條名單各取兩席，建制派就由建仔同工聯會兩條名單亦取兩席，餘下得票最高嘅係阿陶，如果各方勢力不變，新加嘅一席應該係佢嘅囊中物。

泛民建制派未穩攞第三席

不過，社民連分裂，阿陶又同毓民、大舊搞到咁僵，九東嘅形勢當然會逆轉。建制派話，上屆選舉佢哋兩條名單嘅得票只係四成四，但泛民兩條名單卻得到五成多選票，新加一席都唔易落入建制派之手，但泛民分裂卻造就機會，尤其係厭倦社民連黨爭嘅阿陶支持票可能會流向溫和嘅第三勢力，咁樣最傷嗰個一定係阿陶。記得早前白鴿黨嘅李華明先話過，阿陶好急進，如果唔係喺政黨中跳嚟跳去，一定係白鴿黨喺九東嘅中流砥柱，但家吓就算出年參加立法會選舉，席位都危危乎矣。

咁泛民係咪穩攞第三席呢？政圈嘅睇法係好難講，因為白鴿黨同公文袋嘅競爭都激烈，分票唔容易，加上由社民連逃出嘅票可能轉投溫和政團，而早前白鴿黨同社民連兩黨嘅分裂勢力又可能異軍突起，第三勢力甚至未知嘅團體都可能左右選票流向，所以建制派同泛民都話要謀定後動！