膠袋徵費為環保 緣何收益歸商戶

古代嘅程咬金上戰場只有三道板斧，成為笑柄，點知港府仲渣，推動環保來來去去只得一招，就係收錢。排污費、膠袋費、家居垃圾費、電器回收費等等，乜都講錢，當局嘅理由係「用者自付」喎。

嗱，當局又準備推出新招嘞。今年第二季將會就擴大膠袋徵費進行公眾諮詢，據講會由目前只喺大型超市及連鎖店徵收膠袋費，擴展到全部大小商店。本來呢，擴大膠袋徵費唔係問題，最奇怪嘅係，日後所徵收嘅五毫膠袋費既唔係撥作環保用途，亦唔係撥入政府庫房，而係歸商店所有，簡直令人莫名其妙。

冇錯，本港過去濫用膠袋嘅情形確實非常嚴重，有調查顯示，最嚴重嘅時候，全港每日有三千幾萬個膠袋被棄置，呢啲好難分解嘅膠袋全部運去堆填區，隨時造成環保大災難。所以呢，擴大徵收膠袋費唔會有好多人反對，正如環保團體話齋，必須盡快推行添。

不過咁，取之於民，用之於民，既然徵收膠袋費係為環保着想，咁就應該將收到嘅錢用喺環保至啱o架，點解要撥畀商戶呢？正所謂，小數怕長計，自從前年開始實施膠袋徵費以來，收入睇怕冇一億都有幾千萬，如果將呢筆錢用嚟推動環保，都唔知可以做幾多嘢。可惜港府計入唔計出，淨係識收錢，唔識搞環保，結果膠袋徵費全部撥入庫房，袋袋平安，唔怪得有人直斥港府打住環保旗號掠水，叮！

依家仲離譜，擴大徵收膠袋費後，收入唔再撥入庫房，而係歸商戶所有，都唔知究竟係邊個官員度出咁無厘頭嘅屎橋。正如有人話齋，膠袋徵費撥入庫房，可能仲有小小機會用喺環保方面，以後歸商戶所有，豈不是有去冇回？咁徵費又有乜嘢意義呢？再講啦，以後消費者去舖頭買嘢，每用一個膠袋，商戶就有五毫子收入，佢哋又點會阻止客人用膠袋噃。太一叮想問環境局局長邱騰華，港府究竟係想減少消耗膠袋，定係想益商戶？

講開又講，日後擴大膠袋徵費至所有商戶，當局可能需要派大量人手巡查，咁呢筆行政費用又點計呢？有立法會議員擔心成本太高難以執行，唔係冇道理o架。仲有吖，如果有長者開間士多仔，一直無報稅，依家突然話要收膠袋費，可能要增添收銀機記錄稅收，咁豈不是逼士多仔執笠？

古人話，世不患無法，而患無必行之法。無論點都好，當局喺推出任何政策前，必須先諗清諗楚，尊重民意，順應民意，千祈咪好似搞停車熄匙咁，未曾環保先擾民，叮！