勞工處空談關愛 殘疾人難展才能

政府講就天下無敵，做就有心無力，信半成都死。呢，好似勞工處聲稱協助殘疾人士搵工嘅「就業展才能計劃」咁，個名就巴閉嘞，弊在冇料到，根本幫唔到有需要嘅人。

計劃○五年推行，話會透過職前培訓同津貼等方式，鼓勵僱主為殘疾人士提供職位試工，協助佢哋就業喎。資料顯示，由計劃開始到舊年十二月，就業個案有兩千幾宗，但勞工處唔肯回應申請數字係幾多，冇人知道成功比率係高定係低。

勞工處冇理由唔知道有關數據，睇怕係唔想提啫。事關唔少有意聘請殘疾人士嘅團體或者公司都批評計劃欠透明度，官員做嘢唔積極，要申請人食閉門羹，「就業配對」完全係吹水。

有聽障人士志願團體舊年透過計劃招聘聽障文員，申請交咗個幾月都石沉大海。處方開頭話冇收到申請，後來又話收咗，其後又一拖再拖冇處理，要區議會出聲至做嘢。過咗半年勞工處至搵人嚟見工，團體早就透過其他渠道請咗人啦！

志願團體收到十幾位僱主同聽障人士嘅投訴，話勞工處職員辦事求其，唔止僱主望而卻步，求職人士信心亦備受打擊。有位曾留學美國嘅聾啞人士，○六年透過計劃申請文職工作，個案先後有三個主任處理，弊在三個人後來都調咗職，佢次次都要重新登記資料，到頭來都係白等一場，無奈之下惟有自己創業。

有傷殘人士團體負責人直斥，殘疾人士去勞工處搵工，最終得個「等」字，反映配對計劃成效麻麻。亦有團體批評勞工處人手不足，宣傳唔夠，好多僱主同殘疾人士連有呢個計劃都唔知。唉，你話係咪盞搞吖！

計劃成效不彰，勞工處例牌咿咿哦哦唔肯正面回應，只係話個案因人而異，審批僱主申請有多方面考慮，講到好似為殘疾人士諗得好周全咁款。

叮！查實勞工處職員處理殘疾人士求職嗰陣求其是但，早就街知巷聞啦。要聾啞人士打電話約見、要肢體殘疾人士為填寫申請表走幾趟，不過係小兒科。更荒謬都仲有，幾年前，曾被譽為「再生鬥士」嘅二十六歲聽障教師李菁自殺身亡，事件轟動全港，但負責殘疾人士職業轉介嘅勞工處展能就業科職員冇留意新聞，居然喺李菁過身五十幾日後，寫信通知佢去見工，簡直係烏龍夾混帳。

勞工處空談關愛，殘疾人難展才能。「就業展才能計劃」口號係「卓越團隊 ── 共融、共贏」，計太一叮話齋，勞工處服務質素等同「腦殘團隊」，如果唔識得自我改善，咁又點幫殘疾人士搵工吖。叮！