SUN世代：數碼達人乜都問

廖家俊畢業於美國名牌大學，又是科技大學第一位博士生，曾在史丹福大學做研究，再到科大任教授。這樣的履歷，想必是一本正經的學者，結果卻叫人意外。他腦袋轉數快，對事物充滿好奇心。九九年轉投商界，創立數碼科技公司，○九年更將公司上市。正是這顆赤子之心，將他帶往數碼科技界的頂尖位置。

四十三歲的廖家俊（Jack）是「幻音數碼」主席、行政總裁及執行董事。他穿上三件頭西裝，予人風度翩翩之感，再看他的履歷，美國加州柏克萊大學學士及碩士、香港科技大學首位電機及電子工程學博士。九五至九六年在史丹福大學從事研究，九六年回科大任教，九八年晉升為副教授。九九年與科大兩位教授創立「幻音數碼」，○三年全職投身商界，○九年底將公司上市。

從大學的「象牙塔」跳入競爭激烈的商界，Jack也經過一番掙扎：「喺大學教書待遇唔錯，加上我睇住科大成立，同成班同事好close，真係好鍾意科大！但生意愈做愈大，一定要有取捨，當初連埋我有三位教授創立公司，最後得我一個決定跳出嚟。」

擁有逾50項專利

「創業之初，市面用緊大哥大電話、菲林、錄影帶，但我覺得數碼產品會係未來潮流，而且我哋研究壓縮、解壓技術已經好耐，覺得可以運用在生活上。」轉型初期是一大挑戰：「以前只係食家，依家就要自己落埋廚。做生意要好熟悉市場同潮流趨勢，做科技更加要睇遠啲，但產品又不能走得太遠，因為始終要畀消費者消費，要取得平衡。」

公司現時的業務，包括為客戶提供概念諮詢、技術可行性研究、軟硬件設計、外殼包裝設計及生產、物流服務等。公司團隊又不斷研發新技術，已申請逾五十項專利。「以前傳統係香港做marketing，喺內地設廠。但我哋冇做廠，而係接單後再搵啱嘅工廠去做，所以接到嘅生意類型會多好多。」

每事問啟發思考

公司亦由最初只得幾人運作，發展至今有逾三百名員工，深圳也增設了辦事處，營業額比創業初期增長逾一百倍。「以前請同事飲茶，幾百蚊已經找到數，依家請飲茶，要成六千蚊呀，以後唔請啦！」他哈哈笑說。

身為數碼科技界的成功人士，Jack認為好奇心十分重要，「無論教書定做生意，我都好鍾意問問題，亦會留意interesting嘅新產品，從中會有所啟發。」說到終極目標，他不假思索：「進身成世界一流嘅公司，呢啲需要時間，但我相信可以做到！」

Jack'Profile

年齡：43歲

現職：幻音數碼控股有限公司主席、行政總裁及執行董事

學歷：加州柏克萊大學電機工程及電腦科學學士及碩士　　

　　　科技大學電機及電子工程學博士

家庭：已婚

興趣：講嘢、瑜伽、網球、游水、打高爾夫球、跑步、行電腦商場

榮譽：2000年十大傑出青年

　　　2005年香港青年工業家獎