政情：肥根為漁民出頭畀官耍

立法會漁農界議員「肥根」黃容根早前喺立法會答問大會爆大鑊，向煲呔曾投訴新界西近年大興土木導致漁民損失慘重，為漁民出頭追討賠償，竟然畀四個政府部門當波咁踢嚟踢去。肥根突然發炮，大家以為相關官員知驚，點知半個月過去，至今冇人主動聯絡佢跟進事件。

官場推莊卸責歪風盛行，政府部門投訴接受，態度照舊，究竟係當肥根透明吖，定係當煲呔曾冇到呢？肥根話都搞唔清楚，但已經再度約見有份將佢當波踢嘅食物及衞生局官員，但副局長梁卓偉繼續推波，話工程賠償問題由鄭汝樺揸弗嘅運輸及房屋局主理喎，點知去到搵運房局副局邱誠武，得到嘅答案只係：「睇吓點先。」

肥根話自己身形圓渾，但唔會容忍畀人當波踢，遲啲會搵其餘嘅環境局同發展局算帳，甚至踩到政務司司長唐唐頭上，總之要為漁民討回公道。肥根呢次主演漁民版「秋菊打官司」，唔知最終能唔能夠取回公道呢？