政情：搞搞政：葉劉區選搶票不求人

仲記得喺○七年立法會港島區補選，葉劉淑儀曾靠建仔過票，依家佢組成新民黨兼出任主席後，尋日喺大氣電波話年底嘅區議會選舉，新民黨至少會派出八至十名精兵，瞄準中產區全力出擊。佢直言自己過去唔夠地區樁腳，故喺舊年南區薄扶林選區補選，亦需靠建仔幫手，但矢言自己經已組黨，唔可以再厚面皮要人幫，又話政壇經已進入戰國時代啦，唔相信仲會有政黨過票畀人囉。

葉劉仲同建仔劃清界線，聲言自己嘅基本盤同建仔唔同，對方針對基層同公屋嘅票源，而佢只對中產議題有興趣，無意喺公屋區發展。言下之意，佢唔攞基層同公屋票，又唔同建仔搶票，即係不求人，靠自己啦！跟住佢仲認為自己喺七除八扣之後都夠贏，睇嚟幾老定喎！

老實講，建仔過去一年喺唔少議題上，立場都飄忽不定，時因護住特衰政府而得失民意，若葉劉黐埋去，隨時得不償失，都係保持距離好啲。

跟住佢更首度開腔話對參選特首「聽其自然」。問到佢怕唔怕做特首會好辛苦，佢仲即時搶答話自己係辛苦命，又冇家庭負擔，乜嘢崗位都鍾意做喎。呢個答案，絕對予人無限想像空間。