政情：麒伯通波仔有驚無險
因健康理由唔再續約嘅廣播處長黃華麒，下月約滿退休。佢尋日出席任內最後一個公開活動時，就以自身突然發現心臟病嘅故事，勉勵殘疾人士同樣要勇敢面對。
麒伯話有一日起身突然頭痛，心臟亂跳十秒，似係心臟病嘅先兆，於是求醫檢查，果然發現心血管阻塞。佢形容當時心情混亂，自己都心驚驚，仲嚇親太太同仔女，但好彩資訊發達，翻查資料後發現手術成功率高、復發率低，「安心好多，手術前知道三條血管塞晒，醫生都同我講話係濕濕碎！」
結果通波仔手術成功，差不多五分鐘就通完一條血管，雖然佢手術期間意識清醒，但全程唔驚又唔痛，依家生活仲回復正常添！佢話退休後要周圍旅遊，「見多啲美好事物」，但最遺憾就係唔再續約，冇得見證港台數碼化喎。
麒伯話通波仔手術相當成功，依家生活回復正常。