政情：扭擰長毛幫社民連籌款

社民連由內訌變成決裂，三個立法會議員當中，黃毓民同「大舊」陳偉業都退咗黨，得番「長毛」梁國雄，佢尋日特登落去社民連喺維園擺嘅年宵攤位，但就講到明只係幫手籌款。佢強調仲未決定退唔退黨，至於幾時決定要睇個天喎！

社民連攤位今年繼續賣雙節棍香蕉，不過唔知係咪滯銷，捐十蚊就可以拎走一雙。副主席吳文遠仲抵死，只要現場嘅小朋友識答邊個係劉曉波就送，小朋友梗開心啦，但唔知佢哋明唔明啲蕉有乜嘢用呢？主席陶君行就話同毓民及大舊之間嘅錢銀轇轕已經解決，唔會再講太多。

退出社民連另起爐灶嘅人民力量成員李偉儀尋日亦公開講要「除四民」，即係外號白鴿黨嘅民主黨、民協、民主動力同「建仔」民建聯。白鴿黨主席鐵頭仁就話唔怕人哋狙擊，因為「怕熱就唔會入廚房煮餸」，而且佢今年係不惑之年，更加相信個黨嘅路係正確。