政情：守財奴講求變鬍鬚曾唔知醜

新一份預算案下個月發表，財爺鬍鬚曾亦經已去晒幾個地區諮詢會，相信令人最深刻嘅係遇到示威人士送上苦瓜，佢竟然叫示威者自己攞番屋企煮嚟食，如斯涼薄，事後畀市民鬧爆。唔知佢係咪知衰，尋日喺佢嘅網誌上大講「改變」。

鬍鬚曾篇網誌題為「改變，由你開始！」講佢上禮拜再次應邀出席喺本港舉行嘅「MaD全會」開幕禮，同一千二百名嚟自中、港、台等地嘅年輕人「一起見證創意的力量」。對於出席嘅年輕人點樣希望憑藉一股求變信念，衝破框框條條嘅故事，佢好似記流水帳咁，抄錄咗幾段出嚟，平淡如水，毫無情感辭采。

佢喺文中第二段解釋，「MaD」嘅全寫係Make a Difference，中文譯作「變則通，創不同」，又話「MaD」宣揚嘅訊息正係「求變」嘅力量。到咗文末，佢再三強調，創新求變唔係年輕人嘅專利，「無論你或我都要積極擁抱」。首尾呼應，情辭並茂，比起佢做預算案諮詢嘅求其態度，簡直判若雲泥呀。

無力帶港經濟出新天

老實講，鬍鬚曾喺網誌講求變，簡直係天大諷刺。事關佢年年計錯政府開支、估錯通脹同經濟發展預測，但凡喺預算案公布之前，又使出「狼來了」招數，明明庫房水浸，但仲係要誇大財赤，壓低市民對預算案嘅期望，唔該佢對呢啲不變嘅錯失同埋㩒住荷包做守財奴等，Make a Difference先至再講啦。

正所謂「畫虎不成反類犬」，鬍鬚曾講Make a Difference，反而提醒市民，佢訂定預算案，年年交行貨，唔單止派糖招數冇新意，對帶領香港經濟出新天，更加點子欠奉。冇錯，香港真係好需要Make a Difference，尤其係撤換一個不懂變通嘅財爺。