遊埃及港人危城經歷

陳小姐（參加東瀛遊團，本月二十八日出發，昨返港）

「去到當地就知道唔可以離開機場，玩都冇得玩就返香港好慘，來回坐咗三十六個鐘飛機好辛苦。個團離開香港出發時已經係黃色警示，當地局勢咁亂，就唔應該出發。」

趙女士（參加永安團，本月二十二日出發，昨返港）

「開羅同市集都好亂，隱約聽到槍聲，所以大家就留喺酒店冇出去，錯過咗去博物館嘅機會。機場好亂，行李輸送帶又停咗唔郁，好彩終於都返到香港。」

林氏夫婦（參加永安團，本月二十二日出發，昨返港）

「去當地機場途中，見到有汽車被焚燒過嘅痕迹，有人聚集示威，又見到坦克車入城。去到機場又塞車，行李輸送帶又故障，手提電話同上網服務暫停，上咗飛機又好耐都起飛唔到，總之局勢好亂，旅行團暫時唔應該出發去當地。」

羅先生（參加東瀛遊團，本月二十一日出發，昨返港）

「因為有動盪，領隊好快轉咗行程，期間去郊區嘅酒店住咗一晚，都有聽到槍聲同見到催淚彈，又見到有人示威。呢個旅程都幾驚險，好彩領隊做得好，即刻改行程，終於都安全。」