年宵賣弄色情　食署關人個關

「眯埋眼，眯埋眼，好走快兩步」，做父母嘅去維園年宵市場，記住提醒子女眯埋眼，非禮勿視呀。咦，乜唔係「財神到，財神到，好走快兩步」咩？叮，無計啦，多得食環署好帶挈，今年趙公元帥未嚟，鹹片已經殺到。

維園年宵市場前日開幕，本來市民可以一家大細開心購物，但呢個老少咸宜嘅好節目，今年竟然出現「兒童不宜」嘅插曲。有商戶喺近銅鑼灣入口處擺檔，為三級片《3D肉蒲團》宣傳「奇峰突襲」，吸引唔少人嚟湊熱鬧。

咪以為兔年快到，搵幾個「兔女郎」擺吓甫士宣傳咁簡單呀，呢個攤位推出多款以女性乳房及胴體為主題嘅系列產品，「大乳攬枕」、「脫星攬枕」、「雙峰滑鼠墊」應有盡有。店員仲落力咁嗌：「喂，埋嚟睇埋嚟摸啦！唔使客氣，隨便摸啦！」搞到帶住小朋友嘅家長鬼咁尷尬，急急腳走人，年宵嘅合家歡氣氛完全破壞晒。

除咗三級片等兒童不宜嘅產品，攤檔仲打算搞搞新意思，凡買滿一百蚊而又年滿十八歲嘅市民，可獲進入店內嘅小暗房，戴上立體眼鏡睇五分鐘3D鹹片片段，一於先睹為快。

叮！大庭廣眾之下賣啲咁嘅嘢，年宵市場變色慾大笪地，實在太過分。咁搞法，維園豈不是變咗上世紀嗰個「三不管」嘅九龍城寨，脫衣舞、鹹片任睇？

有保護兒童組織負責人批評，食環署批出承租攤位嗰陣，並冇考慮攤位售賣產品會唔會對未成年人士有不良影響。講真，如果只求價高者得，萬一有人連情趣用品都賣，甚至賣埋四仔，當局又照批可也，年宵市場都幾難唔變成色情市場。

最離譜嘅係，艷情片宣傳產品攻陷年宵市場，負責監管嘅食環署一開始居然當冇事發生，關人個關，就算有人到攤檔巡查，只係打個白鴿轉就走人。據講，商戶原計劃喺攤檔頂不停播出3D宣傳鹹片，前日收到當局通知，話唔可以喺公眾場所播放電影宣傳片段，先至收手咋。

叮！咪以為當局為市民着想吖，食環署話，咁做係避免場面太轟動，構成阻塞同不便喎。話到尾，署方根本就冇負起監管責任，話之你賣乜，總之唔好塞住條路，煩唔到佢哋就闊佬懶理。

話時話，食環署一向蛇得就蛇，堵截問題食品次次錯失良機，前排仲因為後知後覺，畀德國「毒蛋」搞到一鑊泡。計太一叮話齋，靠呢班「笨蛋」把關，香港唔變成色慾都市都難。總而言之，未成年人士今年行年宵，記得非禮勿視呀，叮！