City Parade：好戲連場
賀歲巨製一浪接一浪，保良局上周二舉行3D動作喜劇《青蜂俠》慈善首映，城中名人逼爆尖沙咀iSQUARE戲院睇好戲。擔任節目籌委會主席嘅馬清楠總理話，《青蜂俠》宣揚正義精神，意識正面，所以搵佢做主打電影為保良局「吸水」籌款。不過講到偶像，佢最欣賞中國影帝葛優，偶像主演嘅《非誠勿擾2》近日上畫，專登走去捧場。好戲又點止一齣，由英皇電影出品嘅《新少林寺》上周一喺會展舉行首映禮，一眾名人及紅星到賀。
鄭錦鐘泰國新春假期
保良局副主席鄭錦鐘（中）新年將與太太（右二）及千金Vene（左一）遊泰國。
梁寶珠母女情深
保良局副主席梁寶珠（左）與囡囡林玉茵（右）秤不離砣，兩母女連靚衫也交換着，真正做到無分彼此。
郭詩慧代母撐場
莎莎太子女郭詩慧（左）代身為保良局總理嘅媽媽郭羅桂珍撐場，同副主席顏金煒（右）相見歡。
馬清楠與子同樂
囝囝William（左二）係《青蜂俠》迷，節目籌委會主席兼保良局總理馬清楠（右二）帶囝囝食住爆穀睇好戲。
呂鈞堯最愛笑片
保良局主席呂鈞堯（後）愛睇輕鬆笑片，這晚與精靈堂弟Bosco（前）結伴入場。
范太海上歎世界
全國人大常委范徐麗泰農曆年遊西班牙，乘坐郵輪欣賞風光。
趙曾學韞功夫粉絲
近年轉趨低調嘅名媛趙曾學韞，原來係少林功夫迷。
謝偉俊雪白情侶
立法會議員謝偉俊（左）與白韻琴以雪白情侶裝示人，襯到絕。