政情：百仁基金擺年宵行善
年宵花市已經開鑼，今年百仁基金首次投攤位做善事，佢哋揀咗荃灣沙嘴道年宵市場練吓身手。尋日下晝，百仁基金主席施榮忻（Jaime）同太太（Jaymee）、副主席楊華勇、創興銀行後人廖偉麟、百樂集團太子女羅穎怡（Wendy）都喺度。
佢哋透過資助一班傷健人士開檔行善，Jaime話如果反應好，下年都會繼續搞。佢同太太掏腰包力撐，買咗一大堆吹氣玩具返屋企畀兩個女玩。Jaime話兩個女雖然差幾年，但大女好錫妹妹，仲希望妹妹快啲長大，佢尋日買禮物全部打孖嚟，真係一視同仁噃。
施榮忻拉埋太太Jaymee行年宵，買咗好多禮物畀寶貝女。
羅穎怡（中）買咗支雙節棍同大吉風車分別送畀楊華勇（左）同廖偉麟（右），氹到兩個大男人好開心。