政情：搞搞政：黑英推廣潮州文化

有潮人之稱嘅潮州人出咗名團結，近年「架己冷」興起保育文化之風，天文台前台長「黑英」林超英都係潮州人，佢退休之後，周圍做義工，尋日連潮州推廣大使都撈埋，出席一個潮汕語言文化探索講座時大講潮汕語言嘅由來，解構自己嘅家鄉語言。

黑英話，潮州近海，所以潮語同日文有某啲相似之處，佢仲講咗好多歷史地理，一聽就知有料到。不過黑英好謙咁話，自己年紀大，所以先會對自己嘅家鄉語言產生興趣，甚至走去睇書學嘢。唔講唔知，黑英原來係個語言天才，除咗廣東話、英文、潮州話、普通話之外，日文、法文同西班牙文都難佢唔到，睇嚟第日七國咁亂，佢都唔怕溝通唔到。

記得黑英退休之初，成日周圍去，由環保講座、天文研討會都有出席，佢仲打趣話自己之前患咗退休後過度活躍症，搞到成日周圍去「送外賣」，呢排總算靜啲，但又要為推廣家鄉出力，真係要封佢做潮州大使至得。