政情：莎姐石澳派棉被撐新人
自從復出後，富貴黨副主席「莎姐」周梁淑怡就搏到盡，尋日又同另一個副主席方剛分頭落區派禮物。莎姐尋日山長水遠去到石澳村向長者派棉被，因為時間比較短，只係派咗幾十張。點解莎姐去咁遠？或者同撐富貴黨疑似區議員候選人王錦泉有關啩，事關之前兩個禮拜，莎姐都有出席撐黨內新星嘅活動。
方剛係批發及零售界立法會議員，尋日就揀咗旺角西洋菜街、灣仔太源街同銅鑼灣渣甸坊三個出晒名嘅購物區派揮春畀啲檔主。
方剛今年係第三年落區派揮春，今年會派五千張，每張成本一蚊計，閒閒地要派五千幾蚊。佢話最緊要係啲檔主開開心心，其他無計。由於係周末下晝，三個地方都人山人海，檔主反應都唔錯。方剛係名副其實嘅富公子，問佢會唔會唔習慣，佢不假思索就話：「唔會！愈多人愈好添！」
