政情：鬍鬚曾流年講多錯多

兔年將至，過去兩年我哋都搵過香港術數家協會術數師楊子東批算流年運程，結果都好準，今年又點呢？楊師傅話，立春八字欠「土」，亦暗寓木旺火塞，生土無力，欠土影響房地產，樓市會漸向平淡，下半年更急轉直下，「土」虛更寓意山泥傾瀉同航空意外比較多。楊師傅預計，農曆辛卯二月同戊戌九月必有大事發生，大家要小心喇。

楊師傅仲算過三司十二局大部分官員，發現就嚟年滿六十歲、生肖屬兔嘅財爺鬍鬚曾，同年屆六十四生肖屬猴嘅教育局局長孫明揚運程最差，其中鬍鬚曾喺農曆二月即使有良謀亦收效不大，去到農曆九月更加衰到貼地，容易出錯，講多錯多，仲要小心身體健康。至於孫公，兔年政途冇乜重大突破，要注意心血管同眼疾，但佢喺九月就行大運。

兔年運程反覆嘅官員有幾位，包括政務司司長唐唐、政制及內地事務局局長林公公同發展局局長林鄭月娥，其中唐唐兔年行「七煞」運，運程出現兩個極端。據楊師傅推算，兔年官星虛浮，印星無力，寓意做官無力，靠山不穩，高官要醒定啲嘞。