政情：葉兆輝暗寸唐唐心胸窄

港大社會工作及社會行政學教授葉兆輝經常研究青年問題，係「80後」專家，尋日佢喺個電台節目上寸政府，話本港貧富懸殊不斷惡化，房屋政策同民意背道而馳等，見到鄰近地方不斷發展，香港卻原地踏步，真係令人唏噓。

不過，最拮到肉嘅係，早前唐唐話「80後」過激好易「車毀人亡」時，曾借用美國眾議員槍擊案批評香港「80後」，葉兆輝尋日都講番○七年同樣喺美國發生嘅維珍尼亞理工大學校園槍擊案，指校方事後除咗為三十二名受害學生舉辦悼念活動，連槍手韓裔學生趙承熙都在悼念之列，仲指出「只有祝福，沒有詛咒」先能夠消除障礙。呢句話係咪暗寸詛咒、訓斥香港「80後」係「剛愎自用」「閂埋門做皇帝」嘅唐唐？大家自己詮釋啦。

其實，政府早前先委託葉兆輝研究香港「80後」問題，發現大部分「80後」都唔信高官講嘢，部分仲認定只有透過激進抗爭，先可以令政府聽到佢哋嘅聲音。點知呢啲研究拎上政府，高官卻視而不見，專登挑釁年輕人，難怪葉兆輝都要唏噓。