政情：落區騎劫團年飯張建宗做騷寒酸

兔年將至，基層家庭喺高通脹、高物價下飽嘗過年難滋味。政府高官就趁歲尾，排住隊落區做騷，尋日勞工及福利局局長張建宗落去深水埗一個社區中心，同四十幾個露宿者、短期宿位人士共進團年飯。雖然佢帶埋燒味加餸，但餐團年飯嘅菜式都實在太過基層。睇真啲，張建宗呢餐團年飯只係幌子，宣傳露宿者走出「以街為家」嘅生活先係主菜，難怪成個活動騷味十足啦。

政府高官呢輪排住隊落區，先有煲呔曾走去同啲義工一齊包裝福袋，然後派畀啲弱勢階層；後有保安局局長李少光去探老人家，尋日就輪到張建宗接棒。原來佢已經係第二年帶埋燒味落區食團年飯，佢哋嘅飯枱上只得四、五碟餸，除咗燒味外，就只有蒸肉餅、蒸鯇魚同埋烚菜，呢啲菜式真係夠晒平民化。

掛名探訪冇計紓困

本港貧富懸殊幾乎係世界之最。年關在即，貧窮家庭為餐團年飯都傷透腦筋，難為啲高官仲可以巧借團年飯做吓大龍鳳。尋日所見，張建宗擺明係醉翁之意不在酒，目的係借團年飯之便，順道參觀深水埗區嘅短期宿舍，又同啲以前露宿街頭、依家搬咗去短期宿舍嘅人傾吓偈。

行動嘅背後，不外乎藉此宣傳社署嘅政策，尤其係露宿者放棄街頭生活、轉為尋求短期宿舍居住嘅改變。張建宗同其他高官頻頻落區本來係好事，但佢哋同長者、基層人士甚至露宿者、無家可歸人士交流之後，亦睇到咁多基層人士生活嘅困頓，係咪應該嗱嗱聲諗橋解決呢？如果知道民間疾苦都唔做嘢，呢啲高官只會更加令港人不齒。