環保獨沽一味 議而不決嘥氣

「我像如夢初醒，心裏喚你一聲，是我不該錯用情。」唔知點解，睇見環境局局長邱騰華喺立法會講廢物管理策略，太一叮忽然諗起彭羚嘅《如夢初醒》。局長大人話喎，社會已有共識，認為處理廢物問題刻不容緩，而且要多管齊下解決問題。

早知今日，何必當初！其實社會共識早就有，可惜班高官未瞓醒，市民講乜嘢都左耳入右耳出。

講到環保，政府以前確實係用錯情。稍有常識嘅人都知道，處理垃圾要多方面入手，先喺源頭減少垃圾，回收再造，然後先至係堆填、焚化，可惜港府官員腦閉塞，淨識獨沽一味，除咗堆填，仲係堆填。過去十年本港固體廢物增加三成四，現有堆填區好快就會逼爆，如果再唔想辦法，連禮賓府做埋堆填區都未必夠用。

垃圾大軍殺到，班高官至如夢初醒，係威係勢咁搬出一大堆措施。之不過，最怕到頭來又係得個噏字。正如有立法會議員話齋，邱騰華講咗咁多減廢減排政策，但係除咗建焚化爐撥款二百八十多億有實數之外，其他措施都冇進展數字。唔通又想獨沽新嘅一味？

建焚化爐唔係唔好，仲要快快趣趣建，既紓緩堆填區壓力，又可以發電，仲創造就業機會，一舉三得，何樂不為。問題係政府議而不決、決而不行，遲遲決定唔到焚化爐嘅選址，睇怕仲有排拖。

其實，最好嘅辦法係從源頭減少廢物。政府口口聲聲支持回收業，可惜口惠實不至。例如，政府興建維港長廊，關閉觀塘貨物裝卸區，但係又冇同區內嘅廢紙回收商傾掂搬遷安排，卒之搞到全香港嘅廢紙回收商罷收。咁小嘅事都畀班高官搞到一鑊泡，叫人對佢哋點放心！

不妨舉多個例子，係人都知道本港空氣質素惡劣，為咗減排廢氣，政府向立法會申請撥款三千萬元，資助專營巴士公司購置六架混合動力巴士。呢種巴士一經推廣，本港空氣會稍有改善，可惜政府又係唔嗲唔吊，計劃最快要到明年下半年先至展開。唔少議員都批評進度太慢，又冇明確指標，擔心巴士公司試用後唔肯換車，咁咪嘥鬼氣。

講到環保政策，政府只有一樣唔拖，就係徵收膠袋費。環保署尋日話，計劃今年內就膠袋徵費推出第二期諮詢。徵收膠袋費唔係唔啱，但政府收咗錢直接入庫房，唔用番喺環保方面，擺明係以環保名義掠水，市民梗係唔制啦，睇怕今次又有排拗。

多管齊下唔係攞嚟講嘅，講咗就要做。如果政府仲係唔嗲唔吊，拖得就拖，一定搞到垃圾堆成山，香港變臭港。叮！