政情：傑青協會搞低碳晚宴
由歷屆十大傑出青年組成嘅香港傑青協會，尋晚舉行慈善籌款晚宴，為戒毒青少年籌款成立社企，以便協助佢哋為重返社會做準備。本身都係傑青嘅富豪集團太子女羅寶文，更加親自參與設計低碳菜單，大會計過當晚消耗嘅碳之後，遲啲會喺四川種樹進行碳中和，活動嘅概念夠晒新潮環保。
講起晚宴嘅低碳菜單，羅寶文笑稱佢有份同廚師一齊度，由於自己食素，所以最好大家都食素支持，但既然大家畀咗錢，就算啦！菜單最緊要選用本地食材，減少運輸過程，少肉多菜，咁就夠晒低碳環保啦！
現任協會主席龐愛蘭話，佢哋打算開間餐廳畀戒毒青少年多啲接觸人群，暫時仲搵緊投資者同埋地點，依家已經有兩間機構表示有興趣，初步都有醫院願意提供地點，所以最終有機會由醫院開始。
龐愛蘭（右）同羅寶文（左）拍住做善事。