政情：議員幫襯海龍王賀母壽

海洋公園嘅新主題區「夢幻水都」會喺呢個禮拜四開幕，區內嘅全港首個水族館餐廳「海龍王餐廳」係賣點之一，遊客有如置身海底世界，可一邊近距離觀賞珍貴嘅吞拿魚同錘頭鯊等深海魚，一邊用膳。

原來班立法會議員上禮拜已嚟過感受呢個奇妙體驗，海洋公園主席「扮嘢文」盛智文尋日話有兩位議員深深被海洋美景所吸引，訂咗枱為母親慶祝生日，但佢就耍手擰頭唔肯講係邊兩位議員。佢笑言餐廳係根據「可持續海鮮選擇指引」設計菜式，又話冇魚翅供應。之不過，有金箔灑上面嘅海鮮湯喎，一樣咁名貴。

講到新購物區賣奶粉被批評不務正業，扮嘢文難掩心中一股怨氣，多次強調有關批評係唔公平，佢話賣奶粉只係方便家長應急，絕非為賺錢，仲手舞足蹈咁比劃間舖咁大間，賣奶粉嘅貨架只佔一極小位置，唔明點解會被人大做文章，海洋公園已決定唔賣奶粉嘞！