政情：搞搞政：旅遊超人明踩公文袋

被指部署轉戰立法會九龍西嘅旅遊界功能組別議員「旅遊超人」謝偉俊，尋日率先表態傾向競逐連任旅遊界，解釋指一嚟自己都係對旅遊界議題較感興趣，二嚟做直選議員太忙，佢想留番僅餘嘅少量時間處理自己間律師樓業務喎。

雖然謝偉俊由「法律超人」變咗做「旅遊超人」，但寸爆嘅風格冇變過。佢話讀法律嘅人，一旦轉型做直選議員，言行就好容易變得唔持平同膚淺喎！佢為自己留守功能組別辯解之餘，都要踩公文袋班大狀一腳。

話留守旅遊界啫，但似乎唔係穩坐釣魚船噃，事關可能有攔路虎。旅遊超人逐一品評潛在對手，指富貴黨集業內大企業、國泰航空同中西環三股勢力，應會派旅遊業議會前主席何栢霆東山再起，而外界一直盛傳會落場競逐嘅現任旅議會主席胡兆英，唔似會蹚呢潭渾水，反而同經濟動力關係密切嘅梁志群，更大機會落場，甚至會同富貴黨謀求協調，合兩大勢力出擊。咁即係兩黨夾擊佢啦，睇嚟有惡鬥喎！