政情：大舊同長毛割席
社民連創黨主席黃毓民日前聯同黨友「大舊」陳偉業高調退黨，昔日社民連三子只剩「長毛」梁國雄一個。繼毓民日前炮轟唔歸邊嘅長毛「面目模糊」後，同長毛並肩多年嘅大舊尋日亦同佢割席：「長毛呢個人我唔識o架喇，我覺得自己完全唔了解呢個人，佢講乜嘢正義講乜嘢原則啫？」
雖然因未有捲入黨爭而慘被昔日戰友力數，但長毛仍然好厚道，喺電台幫毓民講好說話，又強調自己仲當對方係朋友，只係呢啲嘢唔係單方面就得。
由於社民連依家得番長毛呢個立法會議員，所以佢嘅去留絕對主宰社民連今後嘅命運。社民連尋晚召開會議，決定會盡力挽留長毛，但係會畀時間佢考慮清楚。