政情：郭炳江撐老友攝影展

新地家族內鬥近日亮起曙光，老大郭炳湘日前向傳媒透露，表示喺收取若干「和解費」後，會正式撤出新地業務，意味郭氏家族正式「分家」。消息一出，震驚名人圈。

新地副主席兼董事總經理郭炳江尋日現身中環ifc，為香港歷史博物館諮詢委員會委員同旅行家簡永楨嘅「瑪雅謎團攝影展」撐場。原來郭炳江同簡永楨相識十幾年，見老友早前遊墨西哥東南部嘅猶加敦半島，影咗唔少珍貴相片，一於公諸同好。

齋聽猶加敦半島呢個名已充滿神秘感，郭炳江都流露嚮往神情，話好有興趣遊歷吓。大會尋日以墨西哥薄餅款客，又奉上墨西哥龍舌蘭酒，畀台上貴賓敬酒。龍舌蘭酒屬烈酒級數，郭炳江淺嘗一啖，登時雙眼一亮，露出一副醒神晒嘅表情，唔敢再飲第二啖。

飲咗酒，唔代表郭炳江嘅防線會降低，記者問佢點睇大佬郭炳湘聲稱同家族和解在望，郭炳江相當清醒，一於封口唔評論。