政情：盲頭烏蠅四圍撞 甘威畀官寸到應

白鴿黨甘乃威同公文袋陳淑莊，兩個既係立法會議員亦身兼中西區區議員，以前喺鞋匠牌照問題上，雙方為咗爭政績已經短兵相接，近日爆出THE ICON被指貨不對辦，眼見對家愈炒愈大，甘威又急急腳幫上環永順大廈業主出頭，話隔籬起間酒店太貼，擋住民居開窗。點知伸咗個頭出嚟，政府就話呢間大廈係商用樓宇，改做住宅係違規，外牆冷氣支架係僭建喎！嘩，甘威呢次簡直撞牆！

話說呢間酒店係環境局局長邱騰華胞弟邱騰達任職董事嘅發展公司有份投資嘅，咁啱尋日邱騰華出席立法會環境事務委員會會議，向班議員交代處理都市固體廢物政策最新進度。

唔知甘威係咪心有不甘，想搵邱騰華出氣，一開波就話政府政策追唔上進度，又有好多數據避而不談。講到興起時，提到政府一直鼓吹要起嘅焚化設施，忽然彈咗句：「我都唔知你幾時上嚟拎撥款。」

暴露自己冇做功課

問題係，政府提交嘅文件早就寫明會喺出年上半年上立法會拎撥款，甘威咁講即係暴露自己冇做功課。平時畀議員鬧鑊甘嘅邱騰華好似執到寶咁，即刻當場踢爆話希望甘議員公平啲，時間表擺咗出嚟亦都寫得好清楚啦，寸到應一應。

甘威當然唔服氣，喺第二輪發言時批評政府所提嘅建議全部都要幾年後至發生，可唔可以有啲提早到二○一二年前完成？邱騰華不甘示弱，話所有項目都有好緊張嘅日程表，以前都有好多議員支持嘅政策，咁咪快啲囉，反寸議員先係令政策追唔上進度嘅元兇。

睇嚟甘威都係想博鬧邱騰華嚟攞番啲曝光率，點知好似盲頭烏蠅咁四圍撞，仲接連累同事一齊被寸，佢今鋪真係失晒威！