縮骨僱主使奸計 打工仔焗做老細

工字不出頭,打工仔十個有九個都想自己做老細,唔使畀人點嚟點去。不過有啲老細認真做唔過,收入更奀不特止,有乜冬瓜豆腐責任全部自己孭,直頭慘過打工。

最低工資今年五月一日開始實施,但未見其利先見其害,有僱主為降低工資成本,博大霧做手腳,縮骨招五花八門,包括假自僱、假解僱、要員工負擔部分成本開支、扣飯鐘錢、將休息日變為無薪、裁減人手等等。

本港有勞工團體尋日上街派發有關最低工資嘅「秘笈」,亦設立熱線畀打工仔查詢最低工資計算方法同舉報不良僱主。團體話近期收到過百宗扣飯鐘錢、假解僱或被迫轉為假自僱嘅投訴。

叮!縮骨僱主無所不用其極,有位清潔工人畀僱主轉為自僱,公司判咗個地方畀佢清潔,可以做完就走,工作時間照樣每日八個鐘,但月薪由六千減到得番三千五百蚊,而且乜福利都冇晒,佢惟有劈炮唔撈。

亦有染布廠諗縮數,將工人解僱之後重新聘用,變相將佢哋嘅年資重新計過,第日炒人可以慳番啲遣散費。有單幢式大廈保安公司為咗減少人工支出,將兩更制改為一更制,員工工作量大大增加。

之前已經有藥物包裝服務公司員工踢爆,僱主月初突然要所有散工轉簽承包合約,話明「唔簽冇得做」。逼員工自己做「老細」,原來入面有景轟,轉簽承包合約可免除為強積金供款,僱主慳番一大筆。更攞命嘅係,合約列明承包商要自己買保險,因毀約導致公司蒙受損失,仲要作出賠償。

叮!有冇無良啲呀!轉自僱之後,呢班哎吔承包商變咗「百冇」,收入大縮水之餘,萬一有乜行差踏錯仲要賠錢,隨時可能要貼埋錢打工,擺到明搵打工仔笨啫!

有工會估計,清潔、保安等行業家陣時薪只有廿幾蚊,係無良僱主使縮骨招嘅重災區,飲食業、零售百貨業亦危危乎。農曆新年勞工需求高峰期過後,會有更多打工仔中招。亦有勞工權益組織促請勞工處清楚界定自僱同假自僱嘅準則,以防打工仔任由無良僱主魚肉。

話時話吖,要呢個政府實無良僱主,維護打工仔權益,都唔好寄太大希望咯。呢,睇吓勞工及福利局局長張建宗早排喺本港連鎖快餐集團剋扣員工飯鐘錢風波中嘅表現,就知道政府根本冇心幫打工仔,你死你賤,關人個關,唔爆大鑊都唔會做嘢。

計太一叮話齋,打工仔一定要醒醒定定,碌大雙眼實無良僱主,一見有蠱惑就出聲。總之都係嗰句,靠政府不如靠自己。叮!