政情：梁卓偉沈靖韜合奏舞曲
政府官方facebook「上亞厘畢道」轉載咗食物及衞生局副局長梁卓偉最近同十四歲鋼琴神童沈靖韜合奏嘅片段，曲目係澳洲作曲家班傑明作品、調子輕快嘅《牙買加倫巴舞曲》，兩個人唔使排練就一拍即合，仲好滿意合奏效果。
原來梁卓偉同沈靖韜嘅音樂道路都幾似，大家嘅媽媽都係教音樂，大家都係三、四歲開始學琴。梁卓偉話最懷念英國讀書時代幾乎日日同音樂做朋友，依家就只可以每個禮拜抽幾粒鐘練琴，咁啱舊年九月開始去英國留學嘅沈靖韜亦都話英國嘅功課少過香港好多，有時可以成個下晝盡情玩音樂！
梁卓偉又話音樂教識佢世界之大要眼界闊啲，要彈好一首樂曲就要先知道創作嘅背景，即係要知道歷史咁話喎。不過，年紀輕輕嘅沈靖韜好似冇乜同感，仲話若果冇咗音樂，佢嘅人生就好似冇乜嘢做咁。