政情：唐偉章約小學同學踩單車
依家做大學校長，真係要有十八般武藝，好似理大校長唐偉章咁，識夾band之餘，仲係單車高手。佢尋日同兩位小學同學朝早九點幾由大埔出發，踩到去沙田，全程兩粒鐘，見佢全副武裝，更出動私伙頭盔，佢話咁做等同揸車要戴安全帶，唔懶得。
唐校長迷上單車多年，最深刻嗰次係同細仔喺沙田租車踩，點知出發唔夠半粒鐘就落大雨，惟有急急還車，好彩單車舖老闆夠人情味，退番一半租車錢畀佢。
唐偉章（右二）同德信小學舊友梁立勤（左一）、侯焯汶（左二）及理大學生事務處體育組總主任陳炳祥（右一）踩單車。 （理大提供）
