政情:毓民大舊挖空社民連

社民連創黨主席黃毓民同黨友「大舊」陳偉業召開集思會,逾六百名支持者蜂擁而至,就連久未露面、涉及非禮強姦案嘅「維園阿哥」任亮憲亦到場力撐。最後黃、陳決定退黨,毓民更公開呼籲支持者跟佢走,「冇咗我哋兩個同咁多支持者,你陶君行仲搞得耐咩?我冇任何不捨之意,你哋(支持者)亦唔應該有。」佢仲絕到喺會場預備好一大疊退黨表格。據悉,尋日出席嘅多為毓民同大舊分別喺九西同新西嘅街坊同埋人網嘅粉絲,真正填表退黨嘅黨員不足一百人。

毓民話退黨後,除咗專注搞「普羅政治學苑」嘅政治班外,更會集中火力同選民力量及前綫等團體組成「人民力量」,喺未來選舉狙擊白鴿黨,要佢哋票債票償。對於會否將「人民力量」發展為政黨,佢笑言:「上次組黨賴咗鋪勁,以後再組要從長計議。」

呢邊廂毓民發起退黨潮,阿陶嗰邊似乎有入黨潮。因不滿毓民而退黨嘅前秘書長季詩傑同前財政彭義恍等人正計劃重新入黨,阿陶更喺黃、陳二人宣布退黨後發表聲明劃清界線,表明社民連今日搞成咁,全因「相關會員」不斷將黨內技術問題上綱上線、動輒抹黑。

一直冇就黨內鬥爭靠邊站嘅「長毛」梁國雄,尋日亦畀毓民喺會上點名批評。長毛話對兩名黨友退黨冇覺得特別痛心,直言自己向來獨來獨往,去邊都一樣,但會反省過去半年佢就黨爭問題選擇緘默嘅態度有冇做錯。佢又話,不排除將來會加入其他政黨,但強調公文袋、白鴿黨同毓民新組成嘅「人民力量」肯定冇機喎。

Money18 新功能「18好路數」為你預測心水股票升跌機會率

久未露面、涉嫌強姦及非禮案嘅任亮憲尋日亦有出席集思會。

有六百名「黃派」支持者出席集思會,但原來有一半出席者都唔係黨員。