政情：搞搞政：林健鋒RAP TALK教抗毒

依家潮流興Rap歌，MC Jin紅爆樂壇，連兒科醫生李家仁都喺首《小明上廣州》Rap咗一段，喺互聯網嘅點擊率爆晒燈，有政界人士一於有樣學樣。

話說經濟動力搞嘅「同心結抗毒大行動」尋日舉行閉幕禮，除咗主人家林健鋒（Jeffrey）同梁君彥兩位立法會議員外，仲邀請咗保安局副局長黎棟國同教育局常秘謝凌潔貞出席，Jeffrey喺致辭時忽然好似MC Jin上身咁係咁Rap。

佢話年輕人成長過程中隨時會遇到引誘，如果唔好意思即場拒絕，可以試吓同對方講：「除咗紅豆冰，乜冰我都唔啱！」、「飲咳水小心腦積水！」、「食草？你估我係流？」、「天拿水好吸？你估我係裝修工人呀？」、「食K仔，不如去灣仔！」等等。

在場嘅年輕人似乎好受落，班學生聽完之後即時笑聲四起，仲有人拍手附和添！好心班高官就學吓嘢，好似Jeffrey咁識得轉膊同年輕人溝通先得㗎，惡形惡相咁鬧人只會有反效果o架咋！