政情：富貴黨晒尖子抗衡新民黨

以外國著名學府尖子做生招牌嘅新民黨今個月初成立，外界一致認為對同樣攻中產票源嘅富貴黨衝擊最大。事隔個幾月，富貴黨終於出招，嚟個尖子兵團大晒冷。

富貴黨榮譽主席田北俊尋日夥同主席劉健儀同副主席周梁淑怡，帶住一班高學歷年輕黨員去紅十字會捐血，宣布成立富貴黨青年團。青年團架構有十三人，全屬黨內熱捧新人，絕大部分都係擁有外國名牌學府背景嘅專業人士，主席一職由近期頻頻喺城市論壇發言爭曝光嘅李梓敬擔旗，佢係美國萊斯大學畢業生，曾任美國眾議員A1 Green辦公室見習生，參政意欲濃烈到患流感鼻塞都聞到。至於其他團員，則有眼科醫生同企業行政人員等。

鬥牌頭，青年團同新民黨班尖子邊個勁啲，要秤過至知，但成立儀式上，青年團搵嚟被稱為富貴黨「鍾嘉欣」嘅年輕女黨員歐銘絲撐場，呢樣就肯定撼贏新民黨。

青年團成立儀式喺銅鑼灣街頭舉行，然後拉隊去附近紅十字會集體捐血，象徵為富貴黨注入新血，但睇尖子兵團嘅姿態，似寓意血拚新民黨班後生仔多啲。

派叉燒飯行動唔會停

不過，田少否認搞青年團抗衡新民黨，話○八年已銳意培育第二梯隊，早有一支青年小組，依家只係發大嚟搞咁話。佢仲話，早前落新界東派叉燒飯都係呢班新生仔度嘅好橋。至於惹嚟一場賄選小風波，佢澄清買叉燒飯嗰萬幾蚊唔係黨嘅錢，係佢一名非黨員嘅醫生朋友慷慨解囊贊助，清者自清，派叉燒飯行動唔會停。

田少咁講，唔知新民黨主席葉劉淑儀信唔信呢？葉劉強調年輕化係政黨發展必經之路，歡迎良性競爭。睇嚟新民黨有備而戰，兩黨呢場尖子惡鬥，誰勝誰負，最快年底區議會選舉就知嘞！