爛果報屈得就屈 淫賤黎舔得就舔

哈，爛果報得到個新花名叫「舔盡之霸」，真係有趣到極。顧名思義，所謂舔盡之霸，即係為求目的不擇手段，乜都要舔到盡，就算舔唔到，都要發爛渣嗰種。

講起呢個花名，就唔能夠唔從頭講起喇。話說前日有關注團體公布一項調查結果，指天水圍街市嘅物價仲貴過元朗、屯門甚至灣仔，令人嘩然。之所以會咁，關注團體認為係由於天水圍六個街市全部由領匯管理，造成壟斷咁話。

正所謂，冤有頭債有主，問題係領匯造成，應該搵始作俑者興師問罪至啱㗎，點知爛果報死性不改，又玩針對，選擇性炒作一段陳年舊聞，無端端將李嘉誠旗下嘅長實集團拉落水。爛果報引述舊聞話喎，嘉湖山莊發展商MightyCity一九八二年開發呢個項目之前，已經同政府有協議，限制該區政府物業內嘅商業項目，唔能夠影響發展商嘅商業營運，呢個協議影響至今，搞到區內街市幾乎全部由領匯管理，商戶要捱貴租，市民要買貴餸。

叮！爛蘋果即係爛蘋果，煽風點火，插贓嫁禍，無所不用其極，簡直臭氣熏天。事實係，發展商同政府訂立呢份協議時，長實並非MightyCity嘅大股東，只佔百分之十二點五權益，之後幾年先至增持股權，而且呢份協議早喺二○○二年已經取消。事實證明，所謂「官商勾結」完全係爛果報生安白造。

話時話，協議取消到依家已經九年，天水圍被標籤為「悲情城市」，商業發展始終不足，原因有好多，到底係政府整體規劃不當？定係區內購買力不足缺乏市場？呢啲問題應該由政府去研究及處理，爛果報將責任推喺長實身上，煽動仇富情緒，唔止九唔搭八，直頭別有用心。

講到別有用心，爛果報惡意針對李嘉誠及其公司嘅所謂報道就多咯。呢，李先生重建位於深水灣道七十九號大宅，爛果報無中生有，指大宅獲政府贈送近萬呎樓面；跟住又添油加醋，話大宅一條超過四十米長嘅私家路同近萬平方呎嘅官地係政府「賤價」租畀李家喎。其實，李先生早就向政府補咗五千幾萬元地價，但爛果報就提都唔提。

叮佢個鎯鎯！爛果報含血噴人，死纏爛打，三歲細路仔都知係乜嘢事喇。李先生不屑與自認契弟嘅淫賤黎為伍，拒絕喺爛果報落廣告之嘛，爛果報懷恨在心，長期抹黑李先生，一時話人哋「舔盡」，一時話人哋「惡晒」。查實，講到舔盡，爛果報生安白造，無恥無賴，先至係如假包換嘅「舔盡之霸」；而講到惡晒，淫賤黎誨淫誨盜，反中亂港，將香江搞到烏煙瘴氣，仍然可以得到港英餘孽百般包庇，仲有邊個夠佢惡吖，叮！