政情：葉偉明派梘住家男上身

呢排新界東嘅街坊多着數，繼富貴黨榮譽主席田北俊先後幾次落區派叉燒飯後，尋日輪到工聯會立法會勞工界議員葉偉明。

葉偉明「積極考慮」由功能組別轉戰新界東已人盡皆知，原來佢早排去咗大埔唔同嘅食肆收集廢油，再將啲油製成四千幾塊番梘。尋日佢同班義工特意將啲製成品拎去派街坊，起初大家都唔係好為意，反應只屬一般，但由於檔位喺正街市門口，慢慢人流愈嚟愈多，再加上葉偉明落手落腳用環保梘示範洗碗碟，最終吸引到唔少買完餸嘅街坊注意，高峰期都有成二十個街坊圍住睇㗎，有啲街坊仲請教佢點樣用塊梘洗嘢先洗得乾淨添！

最搞笑係，有位太太突然問葉偉明平時有冇洗碗，葉偉明即時好男人上身，話自己喺屋企雖然負責「煮」，但都會負責「洗」㗎！現場所見，街坊雖然未必個個識佢，但大家收到塊環保梘都好開心，加上工聯會義工將印有環保梘製法同葉偉明個名嘅宣傳單張一齊派，點計都算成功啩。