政情：搞搞政：大律師公會印裔主政

尋日係大律師公會嘅周年大會兼選舉主席嘅日子，印裔副主席、○九年成為資深大律師嘅林孟達（Kumar Ramanathan）喺冇對手下自動當選，接替冧莊兩年嘅高浩文（Russell Coleman）。即係話大律師公會嘅新當家繼續係外籍人士，若講風頭，又會再輸畀香港律師會。

消息話，雖然高浩文表現唔錯，但畢竟同中文傳媒唔係同聲同氣，連帶令大律師公會嘅曝光率都跌Watt，過去兩年聲勢輸畀由王桂壎做會長嘅律師會。所以，公會都好想搵番個華人當家，只係合適嘅華人大狀中，資深嘅好多以前已經做過主席，新人又寧願瞓身搵真銀，打鑼都搵唔到人。

反觀外籍大狀，佢哋一向對大律師公會主席一職好感興趣，因為坐到呢個位證明實力獲認同，身價都唔同晒。林孟達過往相對低調，佢嘅政治立場係點，就要等上任後至知嘞。