政情:陳啟宗拒捐怕政府記仇

曾公開表態拒絕捐款畀關愛基金嘅恒隆主席陳啟宗,尋日以「香港明天更好基金」主席身份同傳媒會面。佢鄭重澄清,對關愛基金嘅憂慮,重點唔係關注啲善款點使,而係破壞咗政府同商界關係愈透明愈好嘅原則。佢話政府先公布一個空空如也嘅關愛基金,再叫人捐錢,「即係叫大家識做啫」,喺咁嘅情況,「有冇人可以同我保證,我唔捐錢,係冇後遺症先?」

佢話唔擔心政府會畀着數捐錢畀關愛基金嘅商家,但擔心唔肯捐錢,「會有預料唔到嘅後果」,如果政府唔講清楚呢個問題,香港隨時走向「印尼化」,事關當年蘇哈圖主政印尼,又係每隔兩、三年就向大企業「募捐」,要企業將未來幾年嘅數個百分點盈利捐畀政府,當時印尼嘅經濟點樣,大家有目共睹。

在場記者追問佢忽然提出有冇「後遺症」,唔通佢三個月前公開拒捐,咁快就感受到政府嘅無形壓力?聽到呢個問題,佢冇回應,只係強調好多商界人士私底下都好認同佢呢套講法。

陳啟宗不嬲都好敢言,佢咁講似係以退為進,兼暗踩政府小器記仇,今次事先張揚報定案,有全港市民做證,政府高層仲敢對佢秋後算帳咩!

Money18 新功能「18好路數」為你預測心水股票升跌機會率

陳啟宗唔回應有冇感受到政府嘅無形壓力。