政情：毓民阿陶 吹雞互劈 社民連 亂

黨內糾紛亂到令人頭暈嘅社民連到底會唔會落得分裂下場，嚟緊禮拜日先有答案，不過創黨主席黃毓民同現任主席陶君行兩派之爭就愈演愈烈，最近仲由人網同討論區舌戰、facebook圍攻政敵，升級到登報互插。黃派嘅李偉儀同虞瑋倩尋日就以「一○憲章」嘅名義，搞咗個超過兩粒鐘嘅記招，力數阿陶不是，加埋「大舊」陳偉業愛將麥業成尋日宣布退出行委，大規模退黨潮已漸見雛形。

任亮憲料現身批鬥會

社民連自「五區公投」前後出現分裂，近幾個月經常互揭瘡疤，尋日嘅記招全程網台直播，李偉儀做兩粒鐘就鬧足兩粒鐘，由「公投」、新花都事件、公司註冊糾紛到近日代道歉聲明，由頭再鬧多次，慌死大家唔知佢要同陶派劃清界線。雖然李偉儀死口唔認會退黨，毓民尋日亦冇現身撐場，但聽佢哋發表「仲攬住個爛橙嚟做乜」嘅偉論，去與留大家都心裏有數。

雖然阿陶有匿名會員登報力撐，仲點名要求毓民同大舊退黨，副主席吳文遠亦喺facebook逐點反擊李偉儀嘅指摘，但另一方嘅攻勢都唔弱，嚟緊禮拜日會舉行「非當權者集思會」，集結月前要求倒閣嘅成員，同埋一班唔鍾意阿陶嘅黨友，變相舉行「阿陶批鬥會」。李偉儀尋日不停呼籲盟友踴躍出席，據悉到時連毓民愛徒、捲入強姦及非禮案而失蹤多時嘅「維園阿哥」任亮憲都會現身，及後交代各人嘅去與留。

不過，就算毓民拉隊退黨，社民連嘅內鬥風波亦未必可以就此平息。及後若然毓民另起爐灶，兩派人未來幾場選舉碰頭時，分分鐘又會繼續互數不是，總之又係得個「亂」字。