保環境應使勿慳 焚化爐該建勿拖

港府終於交出垃圾焚化爐工程同環境評估時間表，話今年首季可以完成。講真，官府做嘢一向慢幾拍，交唔交到功課到時至知。

署理環境局局長潘潔尋日喺立法會話，正研究喺屯門曾咀或者大嶼山石鼓洲興建焚化爐，今年第一季會完成兩個選址嘅環境評估。當局計劃明年初向立法會申請撥款，期望設施可以喺二○一六或者二○一八年落成，每日可以處理三千噸固體廢物，到時堆填區嘅壓力可以大大紓緩，但宏圖大計可唔可以如期推行，要視乎最終選址咁話。

都係嗰句，最怕港府又再議而不決、決而不行，焚化爐完工無期。環境局提交嘅文件透露，如果興建焚化爐、兩個廚餘回收中心再加埋擴建堆填區，估計要使二百五十億，每年總營運開支差唔多要十億。議員要求當局交代開支詳情，睇吓係咪物有所值。

解決都市固體廢物問題事關本港長遠發展，如果攞唔出切實有效嘅措施，唔止郊野公園，甚至成個香港遲早都變晒垃圾堆填區。計太一叮話齋，公帑應使則使，最緊要係使得其所，令政策可以發揮到應有效益。

如果當局喺控制成本方面畀多啲心機，落多啲工夫，焚化爐完全可以發揮作用。再講，本港有數可計嘅幾個堆填區過多幾年就飽和，連潘潔自己都承認，自從當局上次「強徵」郊野公園土地做堆填區引發風波之後，市民普遍認同唔能夠單靠堆填區處理廢物，對香港嚟講，焚化爐係較理想嘅選擇。

雖然港府環保高官對減廢一知半解，成日畀人鬧唔專業，但外國已經有好多成功嘅經驗。環境局局長邱騰華舊年曾經去過日本，考察當地先進嘅垃圾焚化技術，當時仲讚不絕口添，至於點樣吸收人哋啲先進經驗，佢到依家似乎都未有下文。

叮！東洋經驗唔啱使，本地科研成果掂喇啩？點知一樣當冇到。有本地商家早喺五年前已經建議港府採用效率高成本低嘅「環保廢物熔化系統」，點知港府一直愛理不理，自己黔驢技窮，但人哋嘅好橋統統聽唔入耳。

唉，呢個政府搞環保一事無成，唔止固體廢物搞唔掂，「藍天白雲」一樣係阿崩叫狗，愈叫愈走。呢，港大醫學院研究發現，因為空氣污染嘅懸浮粒子影響能見度，本港過去四年年均能見度遠遠未達理想水平，導致四千八百人額外死亡，問你驚未！

保護環境大勢所趨，港府環保高官喺減廢方面如果再冇長遠可行嘅計劃，冇魄力，冇承擔，下下拖得就拖等運到，同送入焚化爐嘅廢物根本就冇分別。叮！