政情：建仔工聯會冷待煲呔曾
喺嚟緊嘅禮拜六，煲呔曾會喺行政長官粉嶺別墅宴請建制派嘅立法會議員，一向親疏有別嘅佢咁做一啲都唔出奇，奇就奇在建仔同工聯會兩個建制派大政黨都反應奇差，建仔十個議員只有兩個去，工聯會四個人就只派一個做代表，就連三個議員都畀面撐場嘅富貴黨亦話估唔到場面咁冷清，情況搞笑。
據了解，工聯會由勞工界議員潘佩璆做代表，其餘三個都肯定會甩底。葉偉明解釋，早已約好街坊同義工喺北區寫揮春，冇理由為咗煲呔曾唔理班街坊咁話；王國興亦係相同理由，話當日早已安排做地區活動，仲話：「去唔去都一樣啦，都燒無可燒咯。」
富貴黨、經濟動力同五散人就會畀面全員撐場，但富貴黨主席劉健儀就講到明，開始嘅時間冇諗過場面會咁冷清，到最後仲講咗句：「點敢唔去吖！」睇到呢度，建制派議員同政府嘅關係係點，相信已經唔使多講。
劉健儀