政情：搞搞政：大輝撩交打傻強硬接

廠商會喺立法會嘅代表林大輝，次次喺大會發言時總會提及《稅務條例》39E條，話現行規定對工商企業有好大影響，希望當局修訂，但早已畀政府以「違反稅務原則」為由拒絕。但大輝死心不息，尋日再度提出口頭質詢，質問財經事務及庫務局局長「傻強」陳家強點解唔見佢，條問題本身已經有公器私用之嫌，點知佢仲死咬住傻強唔放，逼到傻強黑面反擊。

傻強一開始已講得清清楚楚，話修訂39E牽涉重大稅務原則，冇再重新檢討嘅空間，點知大輝就鬧佢「拖、推、避、㩒」，係標準嘅無良官員。大輝擺明係撩交打，傻強都冇咁好氣陪佢發爛渣，繼續重複話呢個問題冇得再糾纏落去。

同大輝同屬「五散人」嘅保險界代表陳健波眼見情況鬧得咁僵，惟有出面打圓場，半笑半認真咁質問傻強，係咪驚大輝有暴力傾向先避而不見呀？話聲一落，議事廳隨即一輪爆笑，傻強亦即刻笑晒，不過就冇直接回應陳健波嘅問題，到底佢係咪驚大輝打人，真係得佢自己先知嘞！