政情：毓民謀退黨割裂社民連

內訌不斷嘅社民連好可能正式分裂。前主席黃毓民同「大舊」陳偉業兩位立法會議員，將喺呢個禮拜日同佢哋領導嘅兩個地區支部黨員開會，密謀集體退出由佢一手創立嘅社民連。屬毓民陣營嘅社民連前副主席李偉儀今日會開記招，再次數臭現任主席陶君行，為禮拜日嘅退黨大會造勢。

毓民唔妥現任主席陶君行好耐，之前透過愛將「維園阿哥」任亮憲發動倒閣，但最後敗北，之後佢改為質疑阿陶去過夜總會、處理任亮憲涉強姦案失當等，計劃發動第二次倒閣。但以前喺白鴿黨搞開倒閣嘅阿陶亦早已做足防備，毓民深知再次倒閣亦未必成功，有消息話佢已下定決心退黨，甚至會即時另起爐灶，關鍵係有幾多人跟隨。

據聞禮拜日開會嘅主要係由毓民同大舊領導嘅九龍西同新界西支部，約有百幾名成員，即上次支持倒閣嘅原班人馬，連同大舊同麥業成共有兩名區議員。至於割據新界東嘅立法會議員「長毛」梁國雄同阿陶領導嘅九龍東支部就影響唔大，名副其實係東西大分裂。港島支部方面就比較混亂，一早同毓民反咗面嘅「阿牛」曾健成會留低，任亮憲同「鹵味男」錢偉洛等則會跟毓民走人。