政情：唐唐開閘關愛基金淪陷

關愛基金最高決策架構係督導委員會，下設教育、醫療、福利同民政四小組，各掌一億元撥款，分管所屬範疇嘅資助項目。本來四小組各歸其類，委員各展所長，井水不犯河水，點知政務司司長唐唐領導無方，令呢個架構運作跣胎出軌，運作一鑊粥，正逐步駛向車毀人亡嘅邊緣。

據了解，訂定四小組名單時，有委員可能睇穿唐唐為人「條條fing」、凡事冇所謂嘅性格，大膽提出容許自由轉組要求，果然，唐唐欣然接受，四小組即變無掩雞籠，其中民政小組被社福界委員長驅直入，亂事四起。

正如方敏生係社聯行政總裁，點秤都應該加入福利小組，但社福界見福利小組已冧夠友，足以主導大局，於是方敏生聯同何喜華進佔民政小組。

有民政小組委員私下埋怨唐唐，打開四小組自由轉組缺口，為民政小組埋下生亂禍根，委員預期社福界冧友入民政小組，喺審理資助項目時，好大機會以社福界嘅利益為先，將民政小組變成福利小組「B隊」，日後經小組批出嘅項目，隨時惹嚟非議。幸好小組主席陳振彬已定出應對之策，就係將所有符合資格嘅項目申請，遞交畀由唐唐做主席嘅督導委員會裁決，即係將個波交番畀唐唐自食其果。