政情：蔡菜子洪為民北上開會冷病

北京人大、政協兩會三月開鑼，但各地省市自治區兩會已經開咗波，港區委員要冒住嚴寒北上開會，身兼港區全國人大代表同福建省政協委員嘅「蔡菜子」蔡素玉（圓圖），尋日喺香港出席一個活動時姍姍來遲，一嚟到就做「幪面超人」戴口罩，到儀式尾聲，佢仲除低口罩當眾「啪丸」食喉片。一問之下，原來佢上福建開政協會，舟車勞頓，加上當地室內室外溫差大，結果中招冷親。

另一個中招嘅係身兼寧夏回族自治區政協委員嘅菁英會常務副主席洪為民，上禮拜佢以第一副團長身份，帶互聯網專業人員協會訪京四日，禮拜五華北地區被寒鋒侵襲，氣溫急降，禮拜六佢就患上感冒同咳嗽。禮拜日轉去寧夏首府銀川開政協會，當地氣溫更加降至零下二十幾度，冰天雪地，令佢病情雪上加霜，發高燒至攝氏三十九點九度，但佢唔肯入醫院打吊針，只肯自己食藥，好彩翌日凌晨退咗燒，跟住第二朝早餐仲可以食羊雜碎暖身添！