政情：議員篤副局邱武最甘

政府以高薪請返嚟嗰隊被嘲為「八國聯軍」嘅副局長同政治助理，上任兩年嚟表現劣評如潮，知名度更處於極低點。咁都不特止，原來班副局連班尊貴嘅立法會議員都懶得理，搞到班議員㷫爆。

街工議員梁耀忠尋日喺立法會提出質詢，話自己近期多次約晤副局商討政策，均被請食閉門羹，要求政府檢討吓。佢直言，自從委任咗班副局後，一眾局長有如攞咗免死金牌一樣，有藉口唔見議員，偏偏連班副局亦唔show佢哋。

阿忠仲酸溜溜咁質疑班副局親疏有別，同某啲議員零舍親近，有得親自接見，對某啲就永遠

林公公夾硬補鑊

跟住有泛民議員點名批評運輸及房屋局副局長邱誠武令佢最激心：「無論係西營盤太陞樓、機場的士定係菜園村收地，需要佢用權力特事特辦時，佢次次都唔出現，又唔覆電話，再唔係就搵公務員出嚟做擋箭牌！」聽到呢個議員咁講，阿忠亦忍唔住開名批評食物及衞生局副局長梁卓偉，同樣喺營養標籤問題上，約嚟約去都約唔到佢傾。

老實講，啲副局政助係要做政治工作，最重要係同班議員溝通，但好似邱武咁個個都匿埋喺井底唔見人，咁擺明係失職啦！難怪好多議員不停咁叫政府炒晒佢哋。

班議員插到啲副局飛起，邱武更被萬箭穿心，但政制及內地事務局局長林公公不斷幫班副局講好說話，強調佢哋一直盡力同議員溝通。佢又幫邱武救火，指佢喺芸芸副局當中，出席立法會大會同事務委員會會議嘅次數排第二，可見佢並非唔看重同議員之間嘅溝通喎。

之但係，議員家陣係質疑班副局拒絕喺會外同佢哋見面，林公公咁樣幫邱武補鑊，係咪有啲夾硬嚟呢？