短打長擊：西九一錯再錯 文化愈行愈遠

西九文化區一拖十多年，人事流失頻密更勝日本換首相，花了大筆公帑至今連一條「文化小草」都未培植出來，如今走了個洋總裁，當局除了全球物色外，又說會擴充人手，明年年底前增加人手近倍，由五十多人增至約一百人！各位，呢啲就叫做「未見官先打八十大板」嘞。

筆者真係i晒頭，一塊爛地使唔使咁多深具文化嘅人打點呢？更奇怪的是，西九管理局說近兩年有四分之一員工流失，基於目前嘅薪酬係金融海嘯之後訂立，可能欠缺競爭力。大佬啊！庫房錢多都唔係咁掟啩！人才與員工流失，政府有冇諗過是否官僚文化作怪？

再講，文化唔係靠人多、靠加薪就水到渠成，依我看，「衣食足然後知文化」，香港有過百萬貧窮人口，加上在職貧窮，咁多人為三餐奔波勞碌，試問何來精力去參與文化、享受文娛呢？

搞文化，新加坡有成功經驗，其實亦即民富國強。新加坡人均國民收入高逾二萬美元，政府推行組屋計劃，統一建房廉價售給國民，全國約八成國民住在組屋，實現了居者有其屋的人類共同理想。

搞文化，民富之餘，亦要加強國家教育、文化建設，提高國民質素，不遺餘力地高標準、大投入。新加坡的教育經費約佔國民生產總值的百分之五，僅次於國防，全國近半人口接受了大專以上教育。此外，新加坡政府特別注重人文關懷，政府積極推行禮貌運動、敬老運動、文化再生運動等。

一個社會的文化是要慢慢積聚凝固，才可以成為習慣，香港本末倒置，可悲也。