港澳碼頭亂糟糟 國際都會太失禮

澳門近年旅遊業大發展，吸引大批外地旅客，聽講每個月由香港去澳門嘅人數有一百五十萬咁多，唔使講，旅客多數喺上環信德中心嘅港澳碼頭坐船。

不過咁，講起呢個來往港澳兩地嘅主要客運口岸，真係失禮死人。設施殘舊不特止，衞生條件更加係嚇死人，太一叮奉勸各位，千祈要自求多福。

點樣嚇死人？帶你去見識吓喇。當你趕到碼頭買咗船飛，仲未夠鐘落船，梗係去大堂等啦。如果人有三急呢？咁就要祝你好運嘞，因為你仲未行到廁所門口，已經聞到陣陣惡臭，行入去更加想嘔，原因係廁所嘅抽風機壞咗。日間仲好啲，如果夜晚就更攞命，事關一到半夜，廁所就冇人清潔，無論你幾眼瞓，一行近廁所就成個人醒晒。仲有，你無論幾急，都要問清係男廁定係女廁先至好入去，事關大堂嗰啲標誌亂晒大龍，男女不分，按指示搵廁所，分分鐘會畀人當色狼，打到豬頭炳咁。

千辛萬苦放低幾両之後，返出嚟又有另一種感受，大堂污糟邋遢，垃圾滿地，玻璃積滿灰塵，坐一陣都周身唔聚財。

終於等到上船嘞，以為可以脫苦海啦，咪開心住，唔好彩撞啱橫風橫雨就弊傢伙，上船嘅通道話就話有上蓋，但根本擋唔到風雨，上得船嚟已變咗落湯雞。仲有噃，你行路一定要帶眼，事關大堂最近進行維修工程，成地都係釘，一個唔小心隨時中招。

本報記者最近去過港澳碼頭內外直擊，總結出令香港蒙羞嘅六宗罪。其實如果大家有親身經歷，可能會發覺唔止六宗罪添。叮！本來興致勃勃過澳門玩，未上船就受盡折磨，乜嘢興致都冇晒啦，如果過大海搏殺嘅，就更係大忌，帶住成身臭氣入賭場，唔輸到甩褲至奇。

旅遊界立法會議員謝偉俊就講得啱嘞，港澳碼頭已經多年冇修葺，設施陳舊，衞生環境又差，等候大堂又不敷應用。港澳碼頭作為香港重要口岸，落後到如斯田地，政府實在難辭其咎，如果唔盡早改善，香港形象實蒙羞。

其實香港喺旅遊業競爭中，一早就畀澳門打沉，以前內地個人遊旅客係嚟香港順便去澳門，家陣嘅趨勢係主要去澳門，順路來香港。不過，睇見港澳碼頭殘成咁，你話佢哋仲會唔會再經香港吖嗱！

叮佢個鎯鎯！香港假假地都叫做國際都會，港府連自己個門口都管唔掂，難為班高官仲話無懼競爭添，真係唔怕笑甩人哋棚牙。