SUN世代:環保戰士倒出黃金路
如果「食幾多、着幾多係整定」這句話能說服甄韋喬,香港便少了一個世界十大傑出青年。他是來自破碎家庭的新移民,中三輟學,曾感到「冇明天,冇出路」。但他即使做最卑賤的倒垃圾工作亦做到最好,終於「倒出」黃金路,成為擁有二千員工的環保清潔公司主席。
四十歲的甄韋喬現任利興控股有限公司主席兼董事總經理,更是○七及○八年的香港及世界十大傑青。由被譏為「阿燦」到一手創辦本港其中一間最大型的環保清潔公司,他的奮鬥經歷本身就是一個勵志的傳奇故事。
被嘲笑 誓言定要出頭
「爸爸係香港人,細個喺鄉下算有錢,間屋又大,點知嚟到香港,要同爺爺、伯父十幾口逼埋一間屋,好唔慣。」甄韋喬八歲隨母親及胞弟從恩平來港,一年後父母離異,他和弟弟隨母親搬往灣仔板間房,母親日間在酒樓做傳菜,晚間縫枱布,他和弟弟年紀雖小,但一樣要幫忙。
「我中一已幫山寨廠鑲嵌錶帶,一毫子一隻,一個鐘可以鑲三百二十隻,手指頭都穿晒!」中三輟學,他先後做過賣錶、酒樓樓面、倉務員,但所有工都做不長,「覺得自己冇競爭力,冇明天,冇出路!」他女朋友(現為太太)的母親為清潔公司管工,叫他幫手做清潔工作。
甄韋喬曾在元洲邨、健康邨倒垃圾,「戴晒口罩,搽埋白花油,但嗰種臭味,都要一段時間先適應到。」後來沙田顯徑邨入伙,他向大判承包清潔工程,「有個師奶拖住個仔,指着我話,如果唔畀心機讀書,第時你就做垃圾佬!其實當時我搵二萬幾蚊一個月,有大哥大電話,但呢幕好深刻,我細個畀人笑阿燦,自卑感好重,我同自己講,一定要出頭!」
八九年他成立「利興」,辦事處設在自己家裏,當時不過十九歲。「初時做得好辛苦,朝早六點起身,夜晚十一點先收工,有啲夥計見我年紀輕,成日扭計,有幾次直情想放棄。」
最成功 清潔重慶大廈
最有成功感的一宗生意,是九三年承接重慶大廈清潔工程。「當年彭定康巡視重慶大廈,發現嗰度亂七八糟,火牛房電線亂駁,而且嗰度有好多唔同種族居住,衞生情況係差到你諗唔到。」
當時的業主立案法團和政務總署決心搞好衞生,「我調動唔同地盤嘅人手嚟幫手『砌』一個月,三個月後彭定康再嚟,見到改變晒,出信嘉許法團主席,主席好多謝我,嗰刻好開心,有好大滿足感。」發展至今,「利興」已有三間子公司,員工逾二千人,再無人睇小這個「阿燦」。他亦不忘回饋社會,成立「雁心會樂幼基金」在內地建校。
甄韋喬小檔案
年齡 40歲
學歷 中學
現職 利興控股有限公司主席兼董事總經理
家庭 已婚,育有三子
社會事務(部分) 香港環境衞生業界大聯盟創辦人兼秘書
香港青年交流促進聯會創辦人兼常務副主席
傑出青年協會執行委員
香港菁英會副秘書長
中華全國青年聯合會第十一屆委員會委員
廣西青年聯合會港區特邀副主席
榮 譽(部分) 2007年香港十大傑出青年
2008年世界十大傑出青年
甄韋喬
○八年榮膺世界十大傑出青年。 (受訪者提供)
甄韋喬與公司員工打成一片。