政情：搞搞政：葉劉抽水轟唐唐鷹派

近來「80後」青年對社會嘅關注同呼聲多咗，政務司司長唐唐日前公開訓示「80後」，更拋出「車毀人亡」等字眼靠嚇，社會嘩然之際，新民黨主席葉劉淑儀尋日都加入聲討，直指唐唐嘅言論屬於挑釁，不但過分，而且誇張，無助政府吸納社會異議。葉劉一輪嘴狂掃，就係唔明點解唐唐要走咁「鷹派」嘅路線。

新民黨位於灣仔嘅總部尋日正式入伙，葉劉聯同兩名副主席史泰祖、田北辰及一眾執委齊齊切燒豬，新張誌慶本來係開開心心嘅，但講到唐唐嘅「80後」言論時，葉劉就變得有火，佢話唐唐嘅措詞極具挑釁，政府若要化解「80後」嘅鬱悶，應解決佢哋所面對嘅學業、就業同置業問題，而唔係鬧人；作為一個政治家，做事要講原則講理據，唔應該表現得咁強硬。

政府呢排興用facebook玩親民，葉劉亦質疑佢哋冇誠意。作為facebook玩家始祖嘅佢話，佢玩facebook係真心想識朋友，唔少facebook朋友最後更成為佢嘅學生同職員，直言政府若只為搞政治化妝嘅話，只會造成反效果喎！