政情：田二少寸大佬派飯冇用

「田二少」田北辰高調退出富貴黨後火速埋咗新民黨堆，佢自言退黨後同阿哥田北俊唔講政治，不過，尋日田少再次落區派叉燒飯，田二少嘅反應卻係「唔得嘅」，仲話自己依家不時落區派揮春、表演魔術，比派貴重嘢更珍貴喎；至於大佬嘅叉燒飯，佢就認為：「如果你派嘅嘢價值高，市民都唔知係為佢（飯盒）定為我。」

田少寒風中派叉燒飯，已經畀該區嘅公文袋立法會議員同梁國雄質疑有賄選之嫌，田二少就以當年喺富貴黨都派過嘢為例，話好多時嚟攞嘢嘅市民都唔知佢係乜頭乜路。至於阿哥落區，佢就補鑊話：「其實大少依家連船都唔坐、孫都唔湊咁落區，已經係一個大轉變啦，派飯都係一番心意啫，食咗真係選佢咩！」

雖然細佬唔睇好，田少尋日都如期再落沙田派發百幾盒叉燒飯，佢強調自己冇賄選，仲踢爆質疑佢嘅公文袋議員都喺該區派過幾百隻糉：「派糉同派飯概念上有咩唔同？身為大狀嘅佢係咪都走緊法律罅？」田少仲認為，細佬田二少唔係寸佢，而係幫佢喎：「佢咁講都幾好吖，佢話我成效低，即係證明我派飯唔係為選票囉！」