政情：阿陶明箭插大舊

社民連黨爭不斷，尋日傳媒收到份聲明，係該黨為「大舊」陳偉業喺行政長官答問大會嘅發言道歉，仲話連日收到會員同市民不滿大舊當日言論嘅投訴，聲明指摘「陳議員伺機攻擊本會同仁，誣陷事實，不斷抹黑，實有違市民對本會立法會議員的期望」。佢哋強調得到過半數行委成員同意先發聲明，事前冇諮詢大舊，仲寸大舊喺議會講嘢前都冇諮詢佢哋。睇嚟大舊同主席陶君行之戰已經開始！

發聲明冇通知

呢封唔算長嘅聲明語氣尖銳，矛頭直指大舊，似同大舊算帳多啲。社民連副主席吳文遠解釋，收到十幾個會員同市民嘅投訴，經過半數行委成員同意後至發份聲明。事前有冇通知大舊呢？吳文遠話，原本黨嘅立法會議員喺答問大會嘅提問會經黨團會議討論，但大舊佢哋單方面喺舊年十一月取消咗黨團會議，大家已經冇溝通。

咁大舊到底講咗乜嘢咁惹火呢？原來上禮拜四嘅答問大會上，大舊質詢時話自己掟蕉、掃枱甚至示威不計其數，但踢爆有人去過新花都夜總會、醉駕就畀人叫收聲，跟住問煲呔曾點解冇叫佢哋收聲？發完無厘頭牢騷，佢就轉移咗話題，事件亦冇下文。大舊提及嘅新花都事件，其實係指社民連創黨主席黃毓民舊年年底喺網上電台爆料，話阿陶曾被該黨前秘書長季詩傑帶去新花都夜總會云云，事後阿陶派再三澄清，但近日維園阿哥事件又加深咗佢哋同毓民派嘅決裂。

大舊喺答問大會上赤裸裸咁暴露黨爭，政圈人士都覺得詫異，但社民連事隔五日至出招，同樣令人錯愕。大舊就好唔滿意，話自己冇做錯事，個黨根本唔需要「代」佢道歉，仲批評阿陶出呢招係企圖轉移視線兼醜化佢喎。