漁人碼頭爛尾 美化工程充數

爛尾樓大家就聽得多嘞，爛尾旅遊景點唔知聽過未呢？嗱，家陣有辦睇嘞，香港仔漁人碼頭計劃就係全港最大嘅爛尾景點。

話說港府十年前決定斥資十億元喺香港仔興建漁人碼頭，要以傳統漁港為主題開拓各種景點，提供旅遊及康樂設施。美國三藩市嘅漁人碼頭，香港人未見過都聽過，有靚海景，有各式海鮮餐廳，仲有蠟像館，有得食有得玩，令人樂而忘返。家陣話喺本港起漁人碼頭，梗係舉埋雙腳贊成啦。

可惜大家只係發咗場夢。政府出晒名拖拉，個計劃提出多年後先至搵顧問公司研究。哈，唔研究仲好地地，一研究就弊傢伙，原來計劃涉及嘅好多幅地都唔可以用。嘩！計劃大縮水！工程面積得番原來嘅兩成咁大把，工程費又由十億縮到兩億，連漁人碼頭個名都唔好意思用嘞。私人發展商見到咁環境，梗係走得快好世界啦，政府無奈叫停工程。

當初講到天上有地下無，卒之以爛尾告終，市民梗唔肯收貨啦，政府被炳到七彩，惟有自己執手尾，決定由庫房出錢，推出所謂發展香港仔旅遊項目。

政府申請撥款二億八千幾萬，話用來提升香港仔嘅旅遊設施，以營造傳統漁港氣氛吸引旅客喎。講就講得好聽，可惜搞埋晒啲濕碎嘢，例如改善海濱長廊景觀、改建觀景台、加設舢舨形座椅等等。唔怪之得連尊貴嘅議員都質疑：個項目好似普通地區美化工程咁，雷聲大雨點小，點說服立法會撥款呀？

其實，工程縮咗水都唔等於死晒火嘅，大有大做，細有細做啫，只要肯動腦筋，就可以將香港仔變成靚景點。正如有議員話齋，香港仔有海鮮批發市場，點解唔學日本築地咁擺魚生檔、串燒小食吸引遊客？點解？因為班高官根本唔係想提升旅遊設施，佢哋只想做場騷氹番市民，話之你可唔可以吸引旅客啦。

講到呢度，大家應該知道乜嘢叫做爛尾景點嘞。不過，大家又知唔知香港有幾多爛尾工程呢？簡直多到數唔晒，比如大澳，政府話過要發展成東方威尼斯，可惜有頭威冇尾陣，落一場黑色暴雨就變成水浸災區。仲有政府用嚟救經濟、促就業嘅十大基建，一係仲紙上談兵，一係搞到唔湯唔水，隨時爛尾。

叮佢個鎯鎯，政府一日到黑話香港唔夠旅遊景點，但係又搞到有潛質嘅景點一個二個爛尾，正一捉到鹿唔識脫角。難為班高官仲好意思話要將香港發展成區域旅遊中心添，慳啲啦！